ДЕШАХЬАЛКХЕ
Аз укх дунен тӀа яьккхача хана чухь чӏоагӀа хувцаденнад вай къаман вахар: торонга диллача — дикача оаг1орахь, оамалашка диллача- …, ийла йича шоашта ховргда шоана.
ВӀаштардаь цӀенош деттад вай, михал массагӀйола мешенаш Іалашъяьй. Цхьаболчарга доккхий рузкъаш кхаьчад. Сискала дизад вай, тӀадувхачоа а эргадаьннад. Цхьан тараза када тӀа дижар из да. Вокх тараза тӀа…
Фуд-те тахан яхь йолча гӀалгӀачоа дега Іаткьар?
Ши вирус я вайх летар: хьалхаръяр — вай багар вай наьна мотт баккха гӀерта вирус; шоллагӀъяр — мадаггара къам декъаш йола вирус.
ГӀалгӀа, хьасомавала! Дарбана оарцавала!
ТIаккха массехк дош укха эпопея керда арахецара хьокъехь.
Эггара хьалха кепатехача беса арахийцад хӀáра том, хувцам боацаш.
Фу кхоачашде лаьрхӀа хьийга къа да ер? — аьнна хаттар отт. Жоп ер да: гӀалгӀачунга ший мехках, ший къаман вахарах ийла яйта. Къонах мел волчунга а, кхалсаг мел йолчунга а. Ийла йича ховргда хӀарачунна дӀахо ший вахара никъ дІа мишта бахьа беза.
Автор
